Implante dentare: si funksionojnë dhe si vendosen

Çka është një implant dentar

Implanti është një vidë e vogël prej titani që vendoset në kockën e nofullës dhe e merr rolin e rrënjës së dhëmbit të humbur. Pasi kocka rritet rreth tij dhe e mbërthen, mbi implant fiksohet kurora, që është pjesa e dukshme e dhëmbit.

Titani përdoret sepse kocka njerëzore e pranon pa e refuzuar. Ky proces quhet osteointegrim dhe zgjat rreth tre deri katër muaj.

Cilat implante përdoren

Marka e implantit nuk është detaj. Ajo përcakton nëse pas dhjetë vitesh gjenden ende pjesët zëvendësuese, dhe nëse ekzistojnë studime afatgjata që e mbështesin.

Në klinikë përdoren tri marka:

Hiossen, e prodhuar në Shtetet e Bashkuara. Hiossen është pjesë e grupit korean Osstem, dhe të gjitha implantet e saj prodhohen dhe paketohen në Pensilvani. Sipas vetë prodhuesit, grupi renditet sot ndër tre emrat më të mëdhenj të implantologjisë në botë.

Bio3 Implants, markë gjermane.

NucleOSS, markë turke me certifikime europiane.

Cila prej tyre përdoret në rastin tuaj varet nga vendi i implantit, nga kocka dhe nga plani i trajtimit. Kjo shpjegohet në konsultë, para se të vendoset asgjë.

Pse implanti dhe jo ura

Një urë dentare kërkon që dy dhëmbët fqinjë të gdhenden, edhe kur ata janë krejtësisht të shëndetshëm. Implanti qëndron vetë dhe nuk i prek ata.

Ka edhe një arsye që nuk shihet me sy. Kur një dhëmb hiqet, kocka poshtë tij fillon të tërhiqet sepse nuk ka më ngarkesë. Implanti e ngarkon kockën ashtu si e ngarkonte rrënja, dhe e ngadalëson këtë tërheqje.

Si zhvillohet procesi

1. Konsulta dhe planifikimi. Ekzaminim, rentgen retro digjital dhe, kur nevojitet, skaner 3D. Matet lartësia dhe gjerësia e kockës dhe përcaktohet pozita e saktë e implantit.
2. Vendosja. Ndërhyrja zgjat rreth 15 minuta për një implant. Kryhet me anestezi lokale dhe me piezokirurgji, teknikë me ultrazë që e kursen kockën.
3. Osteointegrimi. Tre deri katër muaj. Gjatë kësaj kohe mund të mbahet një zgjidhje e përkohshme, që hapësira të mos duket.
4. Kurora. Merret matja digjitale me skaner dhe kurora punohet te tekniku brenda rreth një jave.

Detajet e bëjnë perfeksionin. Te një implant kjo është fjalë për fjalë e vërtetë: pozita matet në milimetra, dhe ajo matje bëhet para ndërhyrjes, jo gjatë saj.

Kujdesi pas vendosjes

Ditët e para: ushqim i butë dhe i ftohtë, pa shpëlarje të forta, pa cigare. Higjiena vazhdon normalisht, por me kujdes te vendi i ndërhyrjes.

Afatgjatë, implanti kërkon të njëjtën gjë që kërkon një dhëmb i shëndoshë: larje dy herë në ditë, pastrim ndërdhëmbor dhe një kontroll në vit.

Çka e përcakton rezultatin

Sasia dhe cilësia e kockës, higjiena e pacientit, duhani dhe sëmundjet sistemike. Të gjitha këto vlerësohen para ndërhyrjes, jo pas saj. Kjo është arsyeja pse konsulta nuk është formalitet.

Deri më sot, të gjitha implantet e vendosura në klinikën tonë kanë arritur osteointegrim të plotë. Kjo nuk është garanci për çdo rast të ardhshëm, sepse çdo pacient ka kockë, higjienë dhe gjendje shëndetësore të vetën. Është thjesht ajo që tregon puna e bërë deri tani.

Përgatitja e instrumenteve

Çdo instrument që ju prek kalon nëpër një cikël të caktuar para se të arrijë te karrigia. Hapat janë shpjeguar një nga një te higjiena dhe sterilizimi në klinikë, bashkë me arsyen pse klasa e autoklavës ka rëndësi.